Yantin dou Chapelot
G. Prieto
Dab lo hret escosent qu'ei tornat lo cèu brum
Dab lo vent arrayos qu'an plegat las arramas,
L'ivèrn s'ei apressat, temps de glaç e de hum,
E deu huec batalhèr, que s'estira l'eshbama.
Apescats e herits, los ausèths ahamiats
Entà cercar l'aspast que porgan hens la huelha,
En mens d'un virat d'uelh cada pais qu'a cambiat
Qu'ei l'ivèrn embrumat dab lo hret quins'aveja.
Estornius e corbaish a mietad empeguits,
Que horrucan los prats en virant la torrada ;
Lo coth entirandat se'n son anats los guits,
Mès au pè de l'arriu que shuca la becada.
Com un teit en penent pintrat a l'espincèu,
Dincau pè deus terrers blanqueja la montanha,
E lo solelh clucat per las brumas deu cèu
Que cropeish dromilhòs hens sa tela d'aranha.