Quoan lou printems hè flouri la brioulète
E punteja aù prat lou berd garou,
Qué béderets auprès de la flourète
A boultija lou daùrat papilhou.
S'en ba paùsa sus l'arose fresquéte
Tout gayasen que semble u diu d'amou
Né counech pas nade pène secrète
Qu'ey mey urous qué lou mey beth segnou.
N'y pas coum you qui soy plé dé tristesse
E qu'ey lou co clabérat dé doulou.
Plé dé turments, qu'em mouri dé féblesse
Coum ey l'aùset embarrat én présou
Si tu bédés aquera pastouréte,
Gay roussignoù qui cantes aù bousquet,
Dap lou tou chant, qu'apérérés Annete,
En ta l'abé près dé tu, tout soulet.
Si l'abès biste, ségude sus l'herbéte,
Enter mouns bras, sarrade téndramen,
Qu'ém debina las més pènes sécrétes
E qu'em balha soun cô entièramen.
Aù diù d'amou, labets quine allégresse,
Dap toun triumfe, ah, qué t'en prègui, hélas,
Push qu'as abut moun cô e ma tendresse
Yamey, yamey, aù mens n'at digues pas.