Filadelfa de Yerda- Genevève Forgues
Répic :
O terro ! terro benadito !
O mounts croubits de néu !
Athéu, athéu
Bléri passa ma bito,
Athéu bléri
Sustout mouri !
Quand ed estiu dauro ras plagnos
E qu’ed ben souspiro tout bach,
Aci, you plouri mas mountagnos
E ma caseto de là-bach.
Atau coumo ra parpagnolo
Qui puno ra flou d’eds sendès,
Houlat d’espouèr, moun cò s’embolo
Decap athéu, d’aro en adès.
Ed soubenir de moun bilatye
Toustem e pertout em seguech ;
En ed malur que-m da couratye
E na gauyou, fièr, que-m sourrech.
Dab ed, ma praubo àmo malauto
Es counsoulè Diu sap eds cops
Dab ed, sus ma pensibo hautò,
Que brèssi-ds sounyes d’autecops.
Ed sé quand ed ben es lamanto,
You cluqui-ds ouélhs pla tristomen
E bey, dabat sa blanco manto,
Ed Pic, couloussau mounumen !
Que bèy ra chouyéto cabano
Oun embarri moun troupèt
Quand ero net sus ero lano
Estenè soun negre capèt.
Ed ibèr, quand hè scu dehoro
E que tout drom à moun entour,
Elas ! que-m semble enténé encoro
Ed doucet marmus de r’Adour,
Là-bach, en uo plagno berdo,
At pè d’u saubatye arroucè,
Que-m semblo, e moun clouchè…
Sense ed espouèr de-p tourna béyé,
O moun bilatye ! O moun balou !
Aban lougtems, qu’ad poudet créye,
You que-m mouriri de doulou…
Mouri ? que disi n’aquesto oro ?
Nou ! quaus que sian mous chegris,
Nou-m bouy mouri qu’em ma Bigorro,
Nou-m bouy mouri qu’en moun Païs !