(Crecion deth grope)
Que tribalhas a barra
E quan la neit e cai
Tu que cages dab era,
Atequit e urós
D’aver hèit la desjunta
Qu’arrenviavas tot ier
Que haràs òta huta
Tà poder te’n des.hèr.
Arrepic :
A prempòs…
N’ei pas morta la vrenha
Se’n arreish
Eth bon vin que boreish…
Nat païs sense paisan,
Nada hèsta sense cantar,
Nat empeut sense gahar,
Nada idea sens lendoman,
Nat ausèth sens libertat !
Sabes dar çò que pòdes
Sens aténder un mercí,
Sabes esconer lèrmas
En ’sclacarats d’arrir,
Condas pas çò qui’t còsta
De sajar d’estar viu,
Tostemps aubrir la pòrta,
Deishar córrer eth arriu.
Qu’as après la manièra
Qu’as comprés la faiçon
De hèr créisher la tèrra,
De hlorir la maison,
Era flor de primtemps
Da heruta l’autona,
Que ns’an a aidar eths joens,
Son dorius coma pomas.
Pòsa’t drin e talaja
Se n’i a d’autes que tu
Qui manejan la granha
Trebatent tiò l’escur,
Mora drin se t’as hida
D’encontrar monde ací
Qu’ei plan lonca la via,
Que van vier… Gaha’t’i !