Flocc de Filadelfa

(Filadelfa de Ierda, Geneviève Forgues)

Serenitat, serenitat,
Patz e bonur aths pastorets…
Patz e bonur aths pastorets…
N’em pas d’ací ! N’em pas d’ací !
N’em pas d’ací !
Cada amna a sua mission sus tèrra ;
Era qui’m revié qu’ei de’m sovier.
E qu’ei perqué me’n vòi en guèrra
A tron e brom contra eth desbromb.

Arrepic :
Païs de l’on sòi,
Doç païs qui canti,
Que t’aimi, ò beròi
Païs de l’on sòi !

Jo la pòrti en còr
Aquera audor santa,
E qu’ei empr’aquò
Que’n vòi haut eth còr.
Tot benadeish e tot canta
Deth primtemps eth doç retorn ;
Tot n’esta planha sharmanta
On se passeja’r’Ador
S’embeveda der’alena
Qui revira’r’amna joena
E qui hola eth còr d’amor
On se passeja’r’Ador.

Qu’èra deth temps beròi e doç
On nosta lenga èra parlada
Peths arreis e peths trobadors,
Quan passé’ra negra halada…
Qu’èra deth temps beròi e doç
On nosta lenga èra parlada.
E, tà que n’at vejossa arrís,
Tot viste’ra lua arredonda
Per davath un nuatge tot gris
Abè’sconut sa tèsta blonda.

Lengadòc ! Provença ! Gasconha !
Cau pas que’s posquie díser enlòc
Qu’eth pòple noste age vergonha
D’arreconéisher eth parlar d’Oc !
Pr’amor, frairs, que se’n cau sovénguer,
Cada lengatge ei un tresòr,
Que n’avem un, que’u cau manténguer
E hèr pervàler, en tot i ténguer
Mes qu’ath argent e mes qu’ath òr.

Eth païs qui canti ei un bèth paîs
E jo sòi, men’ vanti, deth païs qui canti.
Fièrs coma er’arraça qui drilha ath entorn
E qu’arren non alassa ne non pren de cort,
Eth Gave i passa
E’r’Ador i cor,
Arronant a mort
Quan eth pic desglaça…

Fermer