Gaujós se’n va hòrt de matin
Tot en pujant tau cujalar
Dab lo tropèth que cau partir
De cap aus pics on peisherà.
Jamei nat plor hens deu sué còr,
Dinc a l’abòr on tornerà,
Se n’ei anat dab çò de sò
L’uelh estiglant com un lugran.
Hèra de pècs que’s trufan d’eth,
Mès tot aquò que’u hè bèth qué,
Capsús las penas dab lo tropèth
Que’s plaserí matin e ser.
Tot en s’aidant sus lo barròt
Solet e luenh deu maishantèr
Que pugerà dab lo canhòt
Tostemps mes haut com l’esparvèr.
Quan cad lo ser hens lo cledat
Qu’atraça tot en un shiulet
E lo tropèth au de capvath
Cor entà lèu a grans belets.
Puish quan tot ei arrecaptat
Lo brabe aulhèr hens sa cabana
S’adromirà hòrt encrocat
En saunejant a sa companha.
Un bèth matin la devarada
Qu’amassarà tot lo tropèth
Dab las oelhas esquiradas
Se n’anerà dab l’asolet.
E dab lo còr com un batalh
Au doç reclam de las truquetas
S’escaparan hens un miralh
Tant de plasers dab las aulhetas.