(Creacion deth grope. 1998)
Que sòi de cardons e hoguèras,
País on’ras cançons d’amor
Arredòlan peras cantèras
E puish se’n van morir n’estoth.
Que sòi de gèstas e tojagas,
De peus de can e d’ardencamps,
Que sòi de broishas e de hadas,
De gorgas, d’arrius e de camps.
Que sòi de bòscs e castanhèras,
De comas’scuras e brocars,
Que sòi de talhats e costèras,
L’ausèth s’i vié aposentar.
Qu’èi beròis peisheders de ièrba,
Quan vòs t’i pòdes ajassar,
Que sòi cosuda de vriuletas
Soletas ençà e enlà.
E tu qui as begut’ra vita,
E tu qui as minjat eth bren
Sense james botjar la hita,
Òc tu qui as lissat eth temps
N’as james vlut passar’r’aigueta,
N’as james après a nadar,
No’t hèn pas gòi’ras amoretas,
Ací, dab jo que’t vlès estar…
Que sòi de cardons e hoguèras,
País on las cançons d’amor
Arredòlan peras cantèras
E puish se’n van morir n’estoth.