Si voletz saber çò qui n’ei arribat
D’aqueth esprit de vengença,
En Esquiesa que n’an caçat
Sinse n’hèr nada diferença :
Un d’aquestes sers
N’an pres eth can de Poeish
E’th gat de Lamarca en referença.
« Anatz-ne tot près deth Bastan,
Anatz-ne formar ua arquèra,
Mès un shinhau luenh deth batan,
A pus près entre Esquiesa e Cèra,
Tà que non g’aja pas
Chassurs d’arrenards,
Tà qu’era vòsta presa seia entièra. »
Eth Cracamoscas, enratjat
De non èr nada arma tara guèrra,
Era pòrta deth molin que n’a enfonçat
T’anar cercar ‘ra tracadera.
Pièrra deth Marquet,
En passant eth palanquet,
Que se’n dè dus torns en’aguèra.
E Vinhòlis tot espancharrat
Que’u ne fotó r’arcabusada :
« Non sé se’u me b’aja mancat
Dab aqueste fusilh a lonca portada. »
En cap que l’a dat,
En pè que l’a mancat :
Que’n cau fenir pera bastonada.
« A mon Diu, çò ditz Salvat,
Que n’èm hèr d’aquesta auseralha ?
Que’n va caler eishalar quauqu’un
En guisa d’arrepresalha.
Que n’i ètz tots barbaus,
Leishatz estar Casaus
Entà destruír-n era heriòla. »