Quan per mes de garba

(A. Arette-Lendresse)
Quan per mes de garba, la plana de Tarba
Jumpa lo hroment, que revi tostemps
D’aquera arribèra… Que’t vejói tant bèra
Que t’aimèi sus lo moment…
Per un ser de hèsta que’t vejói dançar
E n’avói en tèsta que de t’apressar…
Non sèi pas enqüèra per quina diablèra
E’t virès eths tués galants,
Mès que t’apressès la permèra
Dab l’arríder deths quinze ans…

Au clar deth cèu qu’arriba l’òra de se’n anar per lo país de las amors
E qu’ei per tú, doça Bigòrra, que los soneis deths miés 20 ans estón tant doç
N’ei pas eth só qui’m dè la frèbe ; sus eth tué cap qu’avès l’òr deth hroment
Au blu deths uelhs qu’avès eth rèbe qui hè cantar l’Ador devath eth vent…
Mon Diu, mon Diu, que torne l’òra on s’en anèm per lo sendèr deths amorós
E lo mié còr, doça Bigòrra, garda-u tostemps tà mas amors…

Eth bal que virava, eth sorelh baishava
Que devès partir, non podói sofrir
De’t pèrder tan viste, e tu eth còr triste
Tanpòc non podès mentir….
Que partim amassa non sèi quin estó
Dab lo vent qui passa eth permèr poton…
Tot que s’estelava, l’angelus sonava, vengut deth clochèr d’Ibós,
Qu’averén dit que’m secretejava : torna, torna-t-i si vòs….

L’estela en cèu que merca l’òra on tornarèi per lo pais de las amors
Que tornarèi, doça Bigòrra, entà trobar eths tués sendèrs qui son tant doç
Bèra mainada deth mié rèbe, que sèi que’m demoras aciu delà
Lhèu qu’as au còr bèth drin de frèbe, quan tornarèi eth cèu que serà clar…
Mon Diu, mon Diu que torne l’òra on s’en anèm per lo sendèr deths amorós
E lo mié còr doça Bigòrra garda-u tostemps tá mas amors…

Fermer